DANX və DYP xəbərdarlıq edir!

05-06-2020

Son günlər karantin postlarında yük avtomobilləri ilə hərəkət edən, ancaq müvafiq sənədləri olmayan sərnişinlər aşkarlanır. Bu isə o deməkdir ki, yük maşını sürücüləri onlar üçün yaradılmış vəziyyətdən istifadə edirlər. 
Avtosfer.az-ın əldə etdiyi məlumata görə, onlarla belə fakt aşkarlandığı üçün aidiyyəti dövlət qurumları hərəkətə keçib. Həmin sürücülər karantin rejimini pozduqlarına görə cəzalandırılıblar. 
Nəqliyyat eksperti Elməddin Muradlı hesab edir ki, daha ciddi tədbirlər görülməlidir. "Bu cür sürücülər aşkar edildikdə onların icazə məsələsi yenidən müzakirə edilməli və icazələri ləğv edilməlidir. Çünki bu əməli törədən sürücü yenidən bunu təkrar edəcək." 
Ekspert bildirib ki, karantin rejiminin uzadılması məsələsi hazırda gündəmdə olduğu üçün bu cür sürücülərə qarşı nəzarət gücləndirilməlidir. 
Dövlət Avtomobil Nəqliyyatı Xidmətinin mətbuat katibi Nuridə Allahyarova Avtosfer.az-a bildirib ki, xüsusi karantin rejimi dövründə sui-istifadə hallarına yol verilməsinin qarşısını almaq məqsədilə Nəqliyyat, Rabitə və Yüksək Texnologiyalar Nazirliyi yanında Dövlət Avtomobil Nəqliyyatı Xidməti (DANX) tərəfindən qanunvericiliyin tələblərinə uyğun olaraq fəaliyyətlərini "Fərqlənmə nişanı" əldə etməklə rəsmiləşdirən hüquqi və fiziki şəxslər barədə müvafiq məlumatların "icaze.e-gov.az" portalında qeydiyyatı başlanıb. "Bu günə olan statistikaya əsasən artıq 2549 sürücü qeydiyyatdan keçirilib. Ancaq təəssüflər olsun ki, bu müddət ərzində tərəfimizdən aşkarlanan sui-istifadə hallarına da rast gəlinir. Portalda qeydiyyatdan keçdikdən sonra göndərilən bildirişlərin təyinatı üzrə istifadə olunmaması, yük avtonəqliyyat vasitələri sürücülərinin onlara bu həssas dönəmdə yük daşımaları üçün verilən icazə imkanlarından qeyri-qanuni sərnişin daşımaları üçün istifadə etməsi halları, lüzumsuz yerə (yüksüz) avtonəqliyyat vasitəsindən istifadə edərək yollarda süni sıxlığın yaranmasına şərait yaratdıqları ilə bağlı əməkdaşlarımız və aidiyyatı strukturların əməkdaşları tərəfindən təsbit edilən qanun pozuntuları daha sərt tədbirlərin tətbiqini qaçılmaz edir. "Özünü təcrid" bir mədəniyyətdir, bu dövrdə dövlətimiz adına edə biləcəyimiz ən böyük dəstəkdir. Bu dəstəyi göstərmək əvəzinə, yaradılan şəraitdən sui-istifadə edənlərə qarşı cəzalar sərtləşdiriləcək."
Bakı şəhər Dövlət Yol polisi İdarəsinin şöbə rəisi, polis polkovniki Vaqif Əsədov Avtosfer.az-a açıqlamasında bildirib ki, yol polisi DANX-ın həyata keçirdiyi tədbirlərə qoşulur və bunu dəstəkləyir. "Yol polisinin nəzarət postlarda sürücülərlə yanaşı sərnişinlər də yoxlanılır və müvafiq sənədlər olmadıqda müvafiq tədbirlər görülür."
Vaqif Əsədov bildirib ki, sənədləri qaydasında olmayan sərnişinlər daşıyan yük avtomobili sürücülərinin barəsində müvafiq olaraq müraciət edirik ki, onların hərəkəti məhdudlaşdırılsın." 
Bölmə rəisi fiziki və hüquqi şəxslərə müraciət də edib. Bildirib ki, fiziki şəxslər qoyulan qanunlarla əməl etməli, hüquqi şəxslər isə nəzarəti gücləndirməlidir. "Son zamanlar bu cür sürücülər aşkarlanır. Yük avtomobili sürücüləri düşünməsinlər ki, onlar yol polisini aldadırlar. Əslində onlar özləri-özlərini aldadır və nəticədə aldıqları icazə ləğv oluna bilər."