“Avropa Mobillik Həftəsi” çərçivəsində maarifləndirici tədbir təşkil edilib

Azərbaycan Yerüstü Nəqliyyat Agentliyi (AYNA) nəqliyyat könüllülərinin iştirakı ilə “28 May” Nəqliyyat Mübadilə Mərkəzində maarifləndirici tədbir təşkil edib. Tədbir çərçivəsində mikromobillik və piyada zolaqlarında təsadüfi təhlükəsizlik yoxlanışları keçirilib.

Könüllülər əllərində “Qadağan edilmiş ərazidə mikromobillik vasitələrindən istifadə etmə!”, “Yolda həssas qruplara qarşı diqqətli ol!”, “Avtobusun qarşısından yolu keçmə!”, “Mikromobillik zolaqları piyadalar üçün deyil!”, Riskli manevr etmə!”, “Piyada zolaqlarından istifadə et!”, “Yolu skuterlə yox, piyada keç!”, “Skuter əyləncə vasitəsi deyil, nəqliyyat vasitəsidir!” kimi şüarlar yazılmış plakatlar tutaraq piyadaları yol hərəkəti təhlükəsizliyi, zolaqlardan düzgün istifadə ilə bağlı maarifləndiriblər. Yol hərəkəti iştirakçılarına mövzuya dair broşürlər paylanılıb.

Qeyd edək ki, “Avropa Mobillik Həftəsi” Avropa Komissiyasının dayanıqlı şəhər hərəkətliliyi mövzusunda maarifləndirmə kampaniyasıdır. AYNA Bakı şəhərində “Avropa Mobillik Həftəsi”nə müraciət edib və namizədliyi uğurla təsdiqlənib. Bu istiqamətdə 16-22 sentyabr tarixlərində davamlı hərəkətliliyə yönələn tədbirlər və “Avtomobilsiz Gün” keçiriləcək.