AYNA tərəfindən balacalar üçün əyləncəli-maarifləndirici tədbir təşkil edilib

1 İyun - Uşaqların Beynəlxalq Müdafiəsi Günü münasibətilə AYNA tərəfindən balacalar üçün əyləncəli-maarifləndirici tədbir təşkil edilib. Tədbirdə 6-12 yaşarası uşaqlar iştirak ediblər. Bildirilib ki, ölkəmizdə uşaqların sağlam, hərtərəfli, Vətənə layiqli övladlar kimi böyüməsi üçün hər cür şərait yaradılıb. Onların hüquqları dövlət tərəfindən daim qorunur.

Azyaşlılar üçün əlamətdar olan bu günü daha da maraqlı etmək məqsədilə xüsusi proqram hazırlanıb.

Əvvəlcə uşaqlar üçün paytaxtın gəzməli-görməli yerlərinə avtobus turu təşkil edilib. Onlara marşrut boyu yerləşən tarixi-memarlıq abidələri, müasir memarlıq nümunələri haqqında ətraflı məlumat verilib. 

Avtobus turu yekunlaşdıqdan sonra isə balacalar üçün rəsm təlimi təşkil edilib. Təlim zamanı fırça ustaları uşaqlara rəssamlıq sənəti ilə bağlı məlumat veriblər, onlara boya və fırçadan düzgün istifadə qaydalarını öyrədiblər. Daha sonra uşaqlar nəqliyyat mövzusunda rəsmlər çəkiblər. Rəsmlərdə balacalar Bakının küçələrində şütüyən avtobusları, velosiped və skuterləri, piyadaları təsvir ediblər.

Tədbirin sonunda uşaqlara özlərinin rənglədiyi suvenirlər təqdim olunub.