Qurumlararası əməkdaşlığın gücləndirilməsi məqsədilə infosessiyalar keçirilib

Azərbaycan Yerüstü Nəqliyyat Agentliyi (AYNA) tərəfindən qurumlararası əməkdaşlığın inkişaf etdirilməsi, nəqliyyat sahəsində həyata keçirilən yeniliklərin tanıdılması, əməkdaşların peşəkar inkişafının dəstəklənməsi məqsədilə silsilə infosessiyalar təşkil olunub.

İnfosessiyalar çərçivəsində “Azərbaycan Dəmir Yolları” (ADY), “Azərbaycan Respublikasının Kosmik Agentliyi (Azərkosmos)”, Elektron Təhlükəsizlik Xidməti (ETX) və Milli Süni İntellekt Mərkəzinin (MSİM) əməkdaşları ilə görüşlər keçirilib. Tədbirlər zamanı AYNA-nın fəaliyyət istiqamətləri, şəhər mobilliyinin inkişafı, ictimai nəqliyyatın təkmilləşdirilməsi, rəqəmsal transformasiya layihələri və nəqliyyat sektorunda həyata keçirilən islahatlar barədə ətraflı məlumat verilib. 

İnteraktiv formatda keçirilən sessiyalarda iştirakçıların sualları cavablandırılıb, qarşılıqlı fikir mübadiləsi aparılıb və əməkdaşlıq imkanları müzakirə edilib.

AYNA-nın həyata keçirdiyi bu cür maarifləndirici tədbirlər qurumlar arasında məlumatlılığın artırılmasına, təcrübə mübadiləsinin genişləndirilməsinə və dayanıqlı mobillik sahəsində əməkdaşlığın inkişafına xidmət edir. Agentlik tərəfindən infosessiyaların davam etdirilməsi nəzərdə tutulub.