Zığ şosesindən İnqilab İsmayılov küçəsinə birbaşa keçid təşkil olunub

Bakı şəhərində mobilliyin inkişaf etdirilməsi, nəqliyyat infrastrukturunun təkmilləşdirilməsi, bütün hərəkət iştirakçılarının rahatlığı və təhlükəsizliyinin təmin olunması məqsədilə daha bir layihə icra edilib.

Zığ şosesindən İnqilab İsmayılov küçəsinə birbaşa keçid təşkil edilib. Təhlillərin nəticəsinə əsasən, İnqilab İsmayılov küçəsinin Zığ şosesi ilə kəsişməsində Zığ qəsəbə sakinlərinin yola birbaşa çıxışını təmin etmək məqsədilə dəmir konstruksiyalı arakəsmələr götürülüb, işıqforların quraşdırılması ilə nizamlanan yol kəsişməsi yaradılıb. Layihənin icrası ilə ərazidə nəqliyyat vasitələrinin hərəkəti asanlaşıb.

Həyata keçirilən layihə çərçivəsində yolayrıcında “qırmızı işıqda sağa dönməyə icazə verən” xüsusi nişan quraşdırılıb. Artıq ikinci dəfə tətbiq edilən bu yenilik “Yol hərəkəti haqqında” Qanunun 59-cu maddəsinin VI-I hissəsinə və 66-cı maddəsinin VII hissəsinə uyğun olaraq quraşdırılıb. Sözügedən nişan sürücülərə qırmızı işıqda belə piyadalara və digər nəqliyyat vasitələrinə yol verməklə sağa dönməyə icazə verir. Tətbiqin məqsədi nəqliyyat axınının səmərəli təşkili, gözləmə vaxtının azaldılması və yolayrıcılarının buraxıcılıq qabiliyyətinin artırılmasıdır.

Qeyd edək ki, İnqilab İsmayılov küçəsindən Zığ şosesinə çıxmaq istəyən sürücülər 1500 metr məsafə qət edərək Gəncə prospekti ilə kəsişmənin yaxınlığındakı geriyədönmə yerindən istifadə etməli olurdular. Əks istiqamətdə isə Zığ şosesindən İnqilab İsmayılov küçəsinə daxil olmaq istəyən nəqliyyat vasitələri Hövsan şosesindəki dairəyə kimi 5,5 km izafi nəqliyyat yürüşü etməklə, yaxud Gəncə prospektində yaşayış binalarının daxili yollarından istifadə edirdilər. Bu da həmin yolların yüklənməsinə səbəb olurdu.