Bakıda Azərbaycan-Türkiyə Qarışıq Komissiyasının iclası keçirilib

16-12-2022

Bakıda Azərbaycan və Türkiyə arasında beynəlxalq avtomobil daşımaları üzrə Qarışıq Komissiyanın növbəti iclası keçirilib. Ölkələrimiz arasında diplomatik əlaqələrin qurulmasının 30-cu ildönümünə təsadüf edən yığıncaqda Azərbaycan və Türkiyə arasında iqtisadiyyatın bütün sahələrinin, o cümlədən avtomobil nəqliyyatı ilə beynəlxalq daşımaların əhəmiyyətli dərəcədə inkişafından bəhs edilib.

Rəqəmsal İnkişaf və Nəqliyyat Nazirliyinin tabeliyində fəaliyyət göstərən Azərbaycan Yerüstü Nəqliyyat Agentliyinin İdarə Heyətinin sədri Anar Rzayev bildirib ki, ölkələrimiz arasında nəqliyyat sahəsi ilə yanaşı, digər istiqamətlərdə də uğurlu əməkdaşlıq mövcuddur. O qeyd edib ki, Azərbaycan və Türkiyə arasında daşımaların ümumi həcmi, eləcə də region üzrə üçüncü ölkə daşımalarında iki ölkə daşıyıcılarının aktivliyi artıb.

Vurğulanıb ki, yeni yaranmış reallıqlar fonunda Zəngəzur dəhlizinin açılması ölkələrimiz arasında birbaşa nəqliyyat kommunikasiyalarının genişlənməsi və əməkdaşlığın daha da yüksək səviyyəyə çatdırılması üçün yeni imkanlar yaradacaq. “Orta Dəhlizin cəlbediciliyinin artması nəticəsində Xəzər dənizi limanlarına yük axını əsaslı dərəcədə artıb”, – deyən Anar Rzayev vurğulayıb ki, mövcud şəraitdə hər iki tərəf daşımaların həyata keçirilməsinə dəstək göstərməli, yük axınlarının böyük hissəsini milli daşıyıcılarımızın daşımasına nail olmalıdır.

Türkiyənin Nəqliyyat və İnfrastruktur Nazirliyinin Nəqliyyat Xidmətləri Tənzimləmə Baş İdarəsinin şöbə müdiri  Hasan Boz “e-permit” – “İcazə” blanklarının elektron mübadilə sisteminin təqdimatını edib. Bildirilib ki, rəqəmsal texnologiyaların tətbiqi nəqliyyat əməliyyatlarının sürətlənməsinə şərait yaradacaq.

Tədbirdə qeyd edilib ki, il ərzində avtomobil nəqliyyatı ilə beynəlxalq daşımalar sahəsində qarşıya çıxan məsələlərin bir çoxu işçi qaydada operativ həll edilib.

İclasda Türkiyə və Azərbaycan avtodaşıyıcılarının daşıma proseslərində rastlaşdıqları problemlərin aradan qaldırılması və ölkələrimiz arasında avtomobil daşımalarının inkişafı üçün müvafiq tədbirlərin görülməsi barədə yeni razılıqların əldə olunacağına əminlik ifadə olunub.

Sonda tərəflər arasında beynəlxalq daşımalarda istifadə olunan “İcazə” blanklarının gələn il üçün kvotası razılaşdırılıb və müvafiq Protokol imzalanıb.