Daha bir neçə müntəzəm avtobus marşrutu müsabiqəyə çıxarılır

05-06-2024

Azərbaycan Yerüstü Nəqliyyat Agentliyi (AYNA) sərnişindaşıma xidmətinin keyfiyyətinin artırılması ilə bağlı tədbirlər çərçivəsində Bakı-Naxçıvan, Bakı-Ağdaş, Bakı-Mingəçevir, Bakı-Gəncə və Sumqayıt-Lənkəran şəhərlərarası, paytaxtın 60 nömrəli şəhərdaxili, 141E, 150 və 206 nömrəli şəhərətrafı avtobus marşrutlarını müsabiqəyə çıxarır.

Müsabiqə “Avtomobil nəqliyyatı haqqında” Azərbaycan Respublikası Qanununa, Azərbaycan Respublikası Nazirlər Kabinetinin 2009-cu il 3 aprel tarixli 52 nömrəli qərarı ilə təsdiq edilmiş “Avtomobil nəqliyyatı ilə müntəzəm şəhərdaxili (rayondaxili), şəhərlərarası (rayonlararası) və beynəlxalq marşrutlar üzrə sərnişin daşımalarına daşıyıcıların cəlb olunmasına dair müsabiqənin keçirilməsi Qaydası”na uyğun olaraq təşkil edilir.

Sənədlər 4 iyul saat 17:00-dək Azərbaycan Yerüstü Nəqliyyat Agentliyində (ünvan: Bakı şəhəri, Tarzən Hacı Məmmədov küçəsi 5; əlaqələndirici şəxs: Elsevər Qədimov – tel.: 050-855-53-55, e-poçt: elsevar.gadimov@ayna.gov.az) qəbul ediləcək.

Qeyd edək ki, müsabiqəyə əsas avtobuslarla yanaşı, ehtiyat nəqliyyat vasitələri də təqdim olunmalıdır.

İddiaçıların təklifləri komissiya tərəfindən paytaxtın 60 nömrəli şəhərdaxili, 141E, 150 və 206 nömrəli şəhərətrafı avtobus marşrutları üzrə 4 Lot üzrə iyulun 12-də;

Bakı-Naxçıvan istiqamətində 4 Lot üzrə iyulun 16-da;

Bakı-Naxçıvan və Bakı-Ağdaş istiqamətlərində 4 Lot üzrə iyulun 19-da;

Bakı-Mingəçevir, Bakı-Gəncə və Sumqayıt-Lənkəran istiqamətlərində 3 Lot üzrə iyulun 23-də baxılacaq.

Lotlar üzrə marşrutların qrafikləri haqqında məlumatı buradan əldə edə bilərsiniz.

Şəhərlərarası (rayonlararası) və şəhərdaxili (rayondaxili) marşrut xətləri qanunvericiliyin tələblərinə uyğun olaraq mərhələli qaydada müsabiqəyə təqdim edilir. Məqsəd sərnişindaşıma sahəsində göstərilən xidmətin keyfiyyəti, təhlükəsizliyi və rahatlığının artırılmasıdır.