Ölkədaxili yük daşımalarında elektron əmtəə-nəqliyyat qaiməsindən istifadənin genişləndirilməsi məqsədilə maarifləndirici tədbir keçirilib
04 Mart, 2025

Baş Dövlət Yol Polisi İdarəsi Azərbaycan Yerüstü Nəqliyyat
Agentliyi ilə birgə yük daşımalarında iştirak edən sürücülər üçün Elektron Əmtəə-Nəqliyyat
Qaiməsinin tətbiqinin genişləndirilməsi üzrə maarifləndirici tədbir keçiriblər.
Bildirilib ki, “Avtomobil nəqliyyatı haqqında” Qanunun
40.1-ci maddəsinə və Nazirlər Kabinetinin 2023-cü il 4 oktyabr tarixli 355 nömrəli
Qərarı ilə təsdiq edilən “Elektron əmtəə-nəqliyyat qaiməsinin forması, tətbiqi,
uçotu və istifadəsi Qaydaları”nın 2.1-ci bəndinə əsasən, elektron əmtəə-nəqliyyat
qaiməsi “AYNA” informasiya sistemində yaradılan “Elektron əmtəə-nəqliyyat qaiməsi”
altsistemində tərtib olunmalıdır.
Sürücülərə məlumat verilib ki, daşıyıcı tərəfindən
elektron əmtəə-nəqliyyat qaiməsi ilə rəsmiləşdirilməyən əmtəə təyinatlı yüklər
daşınma üçün qəbul edilə bilməz. Elektron əmtəə-nəqliyyat qaiməsi yükgöndərənlə
daşıyıcı arasında müqaviləni, daşıyıcı tərəfindən yükün daşınmaya qəbul
olunmasını, yükalan tərəfindən yükün qəbul edilməsini təsdiq edir.
Həmçinin əmtəə-nəqliyyat qaiməsində yükgöndərən, daşıyıcı, sürücü və yükalan
haqqında məlumatlar, yüklə bağlı təsdiqedici sənədlər, yükləmənin yeri və
tarixi, avtonəqliyyat vasitəsinin markası və digər zəruri məlumatlar qeyd olunmalıdır.
Elektron əmtəə-nəqliyyat qaiməsi https://e-xidmet.ayna.gov.az/ portalına
daxil olaraq rəsmiləşdirilir. Sürücülərə yüklərin elektron əmtəə-nəqliyyat qaiməsi
ilə rəsmiləşdirilmədən daşınmasına görə İnzibati Xətalar Məcəlləsinin 323.2-ci
maddəsinə əsasən 40 (qırx) manat məbləğində cərimə nəzərdə tutulduğu barədə xəbərdarlıq
edilib.
Onlara hər hansı sual yaranacağı təqdirdə, 141 Çağrı
Mərkəzi ilə əlaqə saxlamaq tövsiyə olunub.
Digər xəbərlər
30 May, 2025
Fətəli xan Xoyski küçəsində yenilik tətbiq olunur
30 May, 2025
Yaxın zamanda daha 15 dayanacaq pavilyonu quraşdırılacaq
27 May, 2025
16 şəhərlərarası müntəzəm avtobus marşrutu müsabiqəyə çıxarılır
27 May, 2025
Avtobuslarla bağlı məlumatlar “Map AYNA”da
22 May, 2025
BNF icazələrinin növbəti bölgüsü keçirilib